ابفلس ما ظن بسوك الهرج تنباع
من حجيك غشيم الراي تن باع
وطلع كله دغش وسموم حيه
الالم يتسلي بدموعي ويلها
واندل السكم روحي ويلها
وجعها آه من نزفه ويلها
كلبي والجفه انولدوا سويه
انتهينا وايست منك وضعنه
وكل واحد منشي بدربه وضعنه
كضه وياك واتبدل وضعنه
امئيس واغسلت منك اديه
اجزعت من الصبر روحي وملت
اهموم احصدت بالدنيا وملت
بنيران الفضا اتجوت وملت
الجزع صاحت من الهم والاذيه
العاذل غير اطباعك ولاشاك
وتخاصمنا وصرت خسمي ولاشاك
الذهب غيرك على احبابك ولاشاك
وخصام انكلب كل ودك عليه
يباري المرض هد حيلي وهدني
ولايوم ابتعد عني وهدني
ارشدني الرحمتك يارب وهدني
طريح افراش والعله خفيه
بعد هيهات اولمهم وراهم
عجاج الظعن عن عيني وراهم
جفوني وظلت اعيوني وراهم
احشبحه او افراك براحات اديه
الواحد ما يصير اثنين بالقيد
ولا عندي حجي العذال بالقيد
دخيل اليسروه للشام بالقيد
يلين المايحن كلبه عليه
صحت الغوث من دنياي وناس
منهم ماشفت بالكدر وناس
هذا الكطع ذاك الغفل وناس
استغيث بخالقي رب البريه
بهيمه ياظعن شوكي وناخوك
ونادوك اعلى كل محنه وناخوك
عضيدك آنه بالشده وناخوك
واصير احزام ظهرك عالدنيه
الكلب لا مظهر ولا مال غربه
ولو عمري بحماده انشتل غربه
ما احمل بكاع اجناب غربه
احن واشتاك لهلي بكل مسيه
سهرت الليل بودادك وحييت
وكلت مرحبه بطارشكم وحييت
يمطرب طفت بالكعبه وحييت
اذا جايب حبيبي اوياك اليه
من منكم علي نشد من سال
جفيتوا وبجفاكم صوت من سال
اشعندي غير دمع العين من سال
اخفف بيه مصار الصار بيه
يناهي لاتشد باراس وبره
تظن منك دليلي يسل وبره
انا جمدوب اكد للظعن وبره
الظعن واهل الظعن شحو عليه
يلوم المادره بروحي شمرها
مايدري الدهر عن ودهم شمرها
ليالي افراكهم والله شمرها
أمر من المنازع بالمنيه
بروح الهوى عيب ابكه ولا خل
انازع والعكل صاحي ولا خل
ابكوتك ما الي صاحب ولا خل
سواك وحرمت وصلك عليه
شوف اشسال من جرحي وشده
وعلي تصعب مداواته وشده
نخيت اشجم خوي بهمه وشده
يصير اصعب من اعدائي عليه
وحك اللي تعبده الناس منشاف
الدمع من يومكم لليوم منشاف
الف ياحيف شفي انكطع منشاف
بعد هيهات جمعتنا سويه
علي معانقك ياترف ويبات
وعون النادمك للفجر ويبات
العاشق دوم يرع النجم ويبات
تجتلونه وعد الله خطيه
تشوف همومي بعيونك و ترها
وتغيب و تقطع بروحي وترها
يرهيك الوقت يسمر وترها
وتصير إنت أبو الراهي عليه
عقلي ياترف حبك وحن بك
من الجوري يامحبوبي وجن بك
إجيت إنت على وعدك وجن بك
ليالي الفرح وأيامي زهية
روحي برشف خدك من عداها
أحب وصلك وهابك من عداها
فراقك يوم أحمله من عداها
أزورك لو تصير أحزاب اليه
وحك الالف واللامين والها,,,,,
روحي بهوى ساهي العين ولها
لها ثغر وجبين وعين والها,,,,,
خد شبه البدر لو سطع ضيــــــــه
اسب اللامني بودك وناحاي
حزني عليك مايبطل وناحي
تبات الناس مستوره ونا حاي
ليلي والنجم يشهد عليـــــــــه
عليمن منشده فكري وبالي
على الي سبب لروحي وبالي
صرت مثل الخشب يابس وبالي
حتى النار...ماتنشد عليه
قلبي ما فرح عقبك ولا سار
وجدمي ما خطا لغيرك ولا سار
اخبرك ما بقت كلمة ولا سار
فضحني الدمع من غصبا علية
ناحل وامشي مكابر تراني
اجلد اخاف عدواني تراني
تارة الموت يدهاني تراني
اصحه من يمر شامت علية
الف وسفة الوقت عنك بعدني
اموت وارتجي وصلك بعدني
وتراني عالعهد باقي بعدني
تراك انته النظر والحيل بيّه
أحبابي اشلـون حــالتــكم بعدنا
اشبدينا والوقـــت عنـــكم بعدنا
إذا انتم نسيتونا ترى احنا بعدنا
أبذكركم كل صباح وابكل مسيه
يـــلايم لا تــــلوم ال?ــــلب دمعــين
جــــرح البــــيه مــــا يندمل دمعين
فــــايض بـــالجفن هـــاليوم دمعين
عـــلى مــصاب النبي وظلع الز?يه
مـــــثل الـــــدوح للـــــونه نبـــــيها
تــــــناوبنه ابحـــــزن واحـنه نبيها
اشـــــلون امــــه الـذي خانت نبيها
ونقـــــضت بـــــيعته وأمر الوصيه
